•   A voceira municipal, Olga Louzao, mostrouse preocupada polo incremento de roubos con forza que se vive na o cidade e considera necesario que se avalíe a seguridade en zonas de risco como os polígonos industriais e as urbanizacións

 

Lugo,  4 de febreiro de 2020.  A voceira municipal de Cs, Olga Louzao, instou esta mañá ao Goberno municipal a convocar con urxencia a Xunta local de seguridade cidadá. «Ante os últimos acontecementos, solicitamos ao Goberno local que convoque esta xunta coa máxima brevidade. É necesario traballar a reo desde esta Administración para supervisar e mellorar, na medida do posible, os protocolos de seguridade e a coordinación entre as distintas forzas de seguridade que actúan no noso municipio», asegurou a concelleira da formación laranxa.

Louzao considera que a convocatoria «está máis que xustificada» debido ao sensible incremento de atracos e episodios violentos que se experimenta na cidade ao longo das últimas semanas. «Temos constancia polos medios de comunicación e por outras fontes de que existe actividade delituosa organizada que ten determinadas zonas da nosa cidade como obxectivo. O roubo con forza dunha banda de oito encapuchados a unha empresa situada no polígono do Ceao a semana pasada debería ser tomado como un síntoma preocupante, sumado a outros roubos, tamén inquietantes. Desde Cs Lugo consideramos que é necesario aumentar a seguridade en determinadas zonas, pero debe ser a Xunta local de seguridade, a través dos responsables policiais quen o determine, por iso é necesario convocar xa este órgano. Instamos á alcaldesa, Lara Méndez, a que o faga sen máis demora», apuntou Louzao.

Polígonos industriais e urbanizacións, as zonas máis sensibles

«Ao longo das últimas horas, propietarios de empresas, traballadores e residentes en urbanizacións estannos facendo chegar a súa preocupación polas informacións das que se fan eco os medios locais. Entendemos este medo xa que desde o punto de vista de seguridade tanto os polígonos industriais como as urbanizacións das zona periurbana e rural son puntos vulnerables. Por iso, consideramos que a Xunta local de seguridade é o espazo idóneo onde se debe tratar este asunto. Comprendemos e compartimos a preocupación dos nosos veciños. O Goberno local debe facer todo o que este na súa man para transmitir protección e tranquilidade. A Xunta local de seguridade e un órgano de coordinación pero tamén informativo. É necesario informar a cidadanía», concluíu a edila de Cs Lugo.